Ons dink dikwels dat ons ‘n pedofiel sal herken – ’n grillerige ou man met ’n donker jas wat kinders met lekkergoed lok. Die realiteit is veel meer ontstellend. Pedofiele is dikwels mense wat ons vertrou: sportafrigters, onderwysers, mentors – volwassenes wat kinders en hul ouers stadig maar seker “groom” vir seksuele misbruik. En dit raak nie net dogtertjies nie – seuns en tienerseuns is net so kwesbaar en dikwels selfs moeiliker om te beskerm.
In hierdie kragtige en noodsaaklike episode van ’n Ma en ’n Mikrofoon, gesels Daniëlla van Heerden met Kolonel Heila Niemand, ’n FBI-opgeleide speurder en lid van ’n internasionale taakspan wat misdade teen kinders ondersoek. Heila deel skokkende insigte oor hoe pedofiele kinders manipuleer, hoe hulle die internet en sosiale media as wapen gebruik, en hoekom selfs “goeie gesinne” nie immuun is nie.
Hoe beskerm ons ons kinders teen hierdie onsigbare roofdiere? Hoe weet jy of jou kind geteiken word? Wat is die subtiele tekens van grooming wat ouers maklik miskyk?
Hierdie episode bied essensiële kennis en praktiese raad wat elke ouer, onderwyser en versorger moet weet. Kolonel Niemand gee reguit antwoorde oor wat ons kan doen om ons kinders se veiligheid te verseker.
Dit is nie ’n maklike gesprek nie – maar dit is een wat ons nie kan bekostig om te ignoreer nie.
Luister nou en deel hierdie episode – want kinders verdien ons beskerming.
